現在小女三年級, 升中有什麼預備

洋蔥頭媽咪

原帖由 little_yolky 於 16-06-27 發表
如果係band1，又未用上操練既方法學習，咁高小都唔會跌太多

我覺得又未必，別忘記高小好多同學仔會發力，所以就算以往成績OK，小五/小六都必須加倍努力，不進則退，若單靠以往成績，分分鐘比人過頭

little_yolky

洋蔥頭媽咪 發表於 16-6-27 12:43
我覺得又未必，別忘記高小好多同學仔會發力，所以就算以往成績OK，小五/小六都必須加倍努力，不進則退，若 ...

所以今個暑假佢哋無得休息

補數、補oral、補英作、游水、學樂器、操曲、表演、跳舞.......仲有阿媽我教既一連串中文同視藝學習課程 哼, 同學仔發力, 點及得阿媽我發功利害

MASAYA

little_yolky 發表於 16-6-27 12:35
如果係band1，又未用上操練既方法學習，咁高小都唔會跌太多

大家都係概念股，妳個率先轉入直路，到時話我知work唔work

MASAYA

洋蔥頭媽咪 發表於 16-6-27 12:43
我覺得又未必，別忘記高小好多同學仔會發力，所以就算以往成績OK，小五/小六都必須加倍努力，不進則退，若 ...

我意思係跑公路個段未鞭佢都可以留係主車群，到跑返入場個陣先鞭佢要跑出應該冇太大問題

MASAYA

little_yolky 發表於 16-6-27 12:51
所以今個暑假佢哋無得休息

補數、補oral、補英作、游水、學樂器、操曲、表演、跳舞.......仲有阿媽 ...

人地阿媽要讀熟d相對論，每人都係得24小時，妳搞咁多野唔壓縮時間邊搞得掂？

scyauchris

回覆 little_yolky 的帖子

為何你阿囡唔反抗你!  如果我按排一連串課外活動佢, 佢肯定發瘨。  我只是報左幾日的短期課程, 我想加畫畫和奥數, 不過都係考慮中, 因為佢一定唔想日日有活動。

little_yolky

scyauchris 發表於 16-6-27 14:26
回覆 little_yolky 的帖子

為何你阿囡唔反抗你!  如果我按排一連串課外活動佢, 佢肯定發瘨。  我只是報左 ...

點會反抗, 佢哋一出街就開心, 因為平時我係禁閉式管理, 佢哋連去旺角睇醫生都好開心。再加上, 只有暑假可以咁安排, 返咗學無時間, 想學都無得學, 我就係平時吊住佢哋條引, 而且佢哋好鐘意我教佢哋嘢


BTW, 講到短期課程, 仲有騎馬仔同打golf

little_yolky

IloveJJ 發表於 16-6-27 14:45
我都俾咗啲要求我仔!
每日睇金庸同英文書、英文卡通片，做一個數學練習。考慮咗好耐，終於決定唔出去補數， ...

因為家姐同我講, 舊年去數X老師講過下今年D嘢, 所以學既時候易明咗, 仲同阿妹講, 上堂老師會請食小食, 所以兩個好開心, 好期待。我實在太多嘢要教, 所以有D真係要外判, 已經同小朋友傾好, 呢個暑假我會同大女讀吓D散文, 兩個一齊讀下古文, 同細女讀下英文書, 同佢哋寫下嘢, 學下英文書法, 有時間寫下毛筆字, 學吓顏色原理, 畫下畫, 教下佢哋烹飪, 真係都相當忙。佢哋又嘈住要去學紙黏土, 但無理由呢D嘢都要俾錢人學, 所以又要抽時間教, 又要返工........

scyauchris

回覆 IloveJJ 的帖子

都有相似的地方, 就是愛看愛情小說

scyauchris

回覆 little_yolky 的帖子

你都㡬勁吓我都有打算叫佢煮飯,  返了學就無時間。

little_yolky

scyauchris 發表於 16-6-27 15:45
回覆 little_yolky 的帖子

你都㡬勁吓我都有打算叫佢煮飯,  返了學就無時間。 ...

佢哋好鐘意玩煮飯仔架

little_yolky

IloveJJ 發表於 16-6-27 15:58
係，我諗我大仔同你大女真係好似，我又係舊年暑假就同大仔用新學年既數學書預習定，即係同佢講解本書講乜? ...

我老細提議我先教《論語》, 《弟子規》就阿妹上堂既參考書, 一定要學, 所以唔駛煩我我諗住節錄一D先秦有用/有趣既嚟教, 唔會全部教晒, 咁緊係要有趣先行啦, 唔係悶到兩個瞓著點算, 仲會加插成語同四字詞咁。家姐好得意架, 三年班開始有得學四字詞, 佢同同學仔嘈交, 會用四字詞, 然後返嚟問我用得啱唔啱, 笑死我。


今年, 我都決定唔同學校訂書, 自己出去買, 早D有書, 佢兩個開心到手舞足蹈(真係跳舞), 話可以早D睇。

little_yolky

IloveJJ 發表於 16-6-27 16:18
咦？咁啱就係呢兩本?真係好啦！咁讀完呢兩本，可以讀咩？等我得閒去買定。



  ...

我諗住上網自製教材咋, 唔買了。每本節錄一D有趣既嚟講, 可以靈活D咁。我唔會教太多, 因為只有兩個月暑假, 所以只係作為文章賞析咁分享。仲會抽D新詩、散文介紹俾佢。另外, 會簡少少五言、七言絕詩, 樣樣少少, 等佢接觸一下。
我書展時會買之前小時了了(應該係佢)介紹果本散文集, 有分記敘、抒情唔同part果本, 有好多作家果本呢, 因為我阿女唔鐘意睇散文, 所以要同佢一齊睇。

小時了了

little_yolky 發表於 16-6-27 17:11
我諗住上網自製教材咋, 唔買了。每本節錄一D有趣既嚟講, 可以靈活D咁。我唔會教太多, 因為只有兩個月暑假,  ...

呢本書我前兩年係元朗三聯買, 以備不時之需, 用作講解俾阿女認識中文文言文唔同朝代嘅演變.


因為阿女小五呈分試常識已教及考晒由周朝至近代八國聯軍嘅中國歷史, 阿女對各朝代已有概括認識, 呢個星期開始, 我每晚重覆呢一版圖表俾阿女睇, 我呢幾晚好簡單好似講故事咁講俾阿女知每個朝代嘅中國文學, 每晚一個朝代, 尋晚講到唐朝喇. 我用大約 5-7 分鐘講

講完故仔後, 我就俾以下教育局編輯嘅該朝代嘅詩/古文俾阿女睇下. 好似前兩晚講先秦文學嘅"詩經", 個晚我俾 "關睢"阿女睇. 另一晚講"諸子百家", 個晚俾論語佢睇. 試咗幾晚, 我感覺阿女吸收到及明多咗文言文. 希望阿女初中中文能順利過渡, 好似小五呈一考試咁順利喇

P.S. 講故+睇文言文大約10分鐘內完成!

免費網上普通話/廣東話朗讀200首詩詞+ 100篇古文: http://www.edu-kingdom.com/forum.php?mod=viewthread&tid=2940610&highlight=200

教育局 - 積累與感興：小學古詩文誦讀材料選編（修訂) (古典詩歌一百首及古文五十篇)

教育局 -《積學與涵泳— 中學古詩文誦讀材料選篇》誦讀示範及篇章賞析(2014年5月更新) (古典詩歌一百首及古文五十篇)

little_yolky

小時了了 發表於 16-6-28 10:20
呢本書我前兩年係元朗三聯買, 以備不時之需, 用作講解俾阿女認識中文文言文唔同朝代嘅演變.

哇, 好好喎。今個暑假, 我集中講先秦。

BTW, 阿女最鐘意明戲劇, 佢已經知道玉茗堂四夢, 其中紫釵記同牡丹亭都表演過了, 真係唔好話興趣班無用。